Bargen Twf Canolbarth Cymru Adnewyddu'r Llif Prosiectau

Galwad am Brosiectau

Yn dilyn adolygiad diweddar o Bortffolio presennol Bargen Twf Canolbarth Cymru, mae Tyfu Canolbarth Cymru wrthi'n diweddaru ac yn ehangu rhestr y rhanbarth o brosiectau arfaethedig ar gyfer buddsoddi'n strategol. Bydd y rhestr hon o brosiectau arfaethedig yn adnabod, yn datblygu ac yn cefnogi cynigion y mae eu heffaith yn fawr ac sy'n barod ar gyfer buddsoddiad, a all sbarduno twf economaidd hirdymor ar draws y canolbarth. Yn ogystal â darparu opsiynau ar gyfer buddsoddi drwy Fargen Twf Canolbarth Cymru, bydd y rhestr o brosiectau arfaethedig hefyd yn sicrhau bod y rhanbarth mewn sefyllfa gref i fanteisio ar gyfleoedd yn y dyfodol i gael cyllid cyfalaf a buddsoddiad gan y sector preifat.

Drwy ddatblygu rhestr ranbarthol gadarn ac amrywiol o brosiectau arfaethedig, gallwn sicrhau bod y rhanbarth yn barod i ymateb yn gyflym pan fydd cyfleoedd o ran cyllid yn codi, a sicrhau ar yr un pryd ein bod yn cryfhau'r Portffolio cyffredinol ac yn gwella gallu'r rhanbarth i gyflawni twf economaidd hirdymor.